Di Sait Vo Lusérn



01/06/2012
(Manifestazioni eventi)

ALPIN UN SCHÜTZEN ENA Z’STRAITA



Gli Schützen sono i «bersaglieri » della Baviera e del Tirolo. Il loro raduno a Folgaria serve a ricordare il comune passato e a rinsaldare i legami di amicizia fra le regioni del Tirolo storico. Forse per questo a qualcuno dà fastidio… I khüz lai hoatar: i pinn nia gest a groazar tschell von Schützen, un no mindar von Alpìn. I pinn njånka gånt soldado i, un pitt laüt, boda gian ummar pitt bandìarn un sklöpp, hånne bintsche zo toala. Asó, höarante vor månat ke di Alpìn von gåntz Beleschlånt beratn khennt zo vennase alle panåndar ka Poatzan, gibez zuar, i pinn nètt gest pròpjo kontent un ‘z hattmar parirt soin a provokatzjong. Aüchåndarn lusérnarn, boazez, izta nètt mengl zo khödaz umbromm. Haüt, drai bochan darnå, pinne no konvintzart ke Poatzan iz nètt da djüst statt zo vüllaze au pitt trikolori. Ma i much khön, ke ‘z iz gest, allz ummaz, a schümmandar vairta, voll pitt musika, gesinga, gièzza, getrinkha un vil lustege laüt ummar pa bege boda håm vorlenteget, vor a boch, disa flappate, lounege statt, boda nia nicht vürkhinnt. Di alpìn håm gezoaget zo vorstiana, ke ‘z Südtirol iz nètt a provintz von Beleschlånt azpi alle di åndarn, un håm sinamai getrak striavan pitt grüaz atz taütsch. Di poatzanar un di meararstn südtirolar hamen gètt an barmen bolkhennt un håmse gevairt pinn gåntz hèrtz. Allz iz gånt gerècht azpi ma nia hettaten impitet un, an lestn, di alpìn soin gekheart luste un kontent bidrumm humman. Lai di Schützen vo Südtirol håmda gemenglt: da soin gest invidart, ma da håmsan nètt geböllt bizzan zo nemma toal, un ma mucht vorstian umbromm. Est, di earstn tang vo sunjo, trèfftz in Schützen von gåntz alt Tirol un vo Bayern zo vennase alle panåndar atz Folgrait un iz hoatar ke, disa bòtta o, nètt alle bartn soin kontent. Defatti dar mucht bizzan, ke di Schützen håm gevånk, vor disa manifestatzjong, kontribute vo zirka 90.000 euro. Dar konsildjiar vo dar Provintz vo Tria Giorgio Leonardi haltet az sai a schånt, gem sovl gelt in Schützen boda khemmen atz Folgrait - asó khüttar er - zoa zo manifestara kontro in Beleschlånt. Imen un alln in laüt boda gloam asó, böllate khön ke di Provintz von Südtirol hatt gezert, vor di Alpìn ka Poatzan, mearar baz 900.000 euro, nètt bintsche gèlt in zaitn vo krisi. Furse inan tage, nètt asó vort bait, Alpìn un Schützen bartn vairn un trinkhan in kompanìa azpi tschelln, lachante da drau aff ditza stokhate gestraita. Intånto auguràre in Schützen un alln in laüt an schümman vairta atz Folgrait. Paolo Pergher

l'adige pag.45