In ar bòtta dar snea iz khent abe vonhümbl, haüt khintar auz von kanü!
In ünsar zung izta nètt lai an uantzegez bort zo khöda ke ’z snaibet: ’z mage frössln, odar vèlmesan odar gian bint un snea.
Dise djar izta khent a vögele zo köda ke ’z hettat gesnibet, ’z iz gest ’z schèrtzarle. Haüt schaubar alle di zait in "internet" un bar bizzan sa betta bèttar ’z bart machan in a gåntza boch!
Dise djar di khindar håm geschauget hèrta auz pa vestar balda soin khent di bolknen un balda håm gesek ’z schèrtzarle soinsa gest sichar ke ’z berata gerift dar snea. Benn ’z izta gest dar snea di månnen håm gemèkket di staigela pinn snearoaf un håm getrakk in mist in di èkhar pittar penn attn slit un ka långez izzar khent auzgeströbet. Pan summar di månnen soin gest alle vort von lånt zo macha di maurar. Di baibar håm boróatet in khast holtz in balt un pan bintar di månnen håm geprenk ’z holz da huam pinn slitn. Daz abas di laüt soinse gevuntet in di stèll odar in di haüsar attavorå in vaür zo macha filò.
Zo bèrma ’z pett, vor da soin gånt zo slàva, håmsa genützt di “monega” pinn glüat un da barm vlasch. Att di vestadar izzese gemacht dar raif un zoa nètt zo mocha gian auzzalt pa dar nacht håmsa genützt in kruage. Ditza ombrómm di apört soin gest auz von haus odar da soin gånt in stall, bo ’z iz gest bermar. ’Z geplèttra åzolega iz nètt gest barm az be in ta' vo haüt un hatt nètt auzgehaltet in reng un in bint. In di sèchtzegar djar soinda gerift di earstn djube un di pèrkschua soin gest pitt ledar. ’Z hatze gemacht dar schuastar von lånt un azmen nètt hatt augètt di salbe von schua håmsa nètt auzgehaltet ’z bazzar un in snea. Di khindar soin gånt zo spila lai pinn bollan hångas un håm gemacht galerìe un fortìn in pa hauvan snea un gespilt in kriage pinn pèll snea: lusérnar zuar tetschnar odar kontro in khindar von Ekk un von Prünndle.
Daz abas håmsa gehatt gevrort di hent un di vüaz un benn da soin gerift da huam håmzar no gevånk a karge!
Disan bintar hatz lai gesnibet a bòtta un biane nicht. Haür di Boinichtn soin gest åna snea un vor a par djar, hatz gerenk durchauz, tage un nacht. Dar snea iz az bi a barma dekh un sèmm untar allz schlaft finn ka långez. Di earde rastet un iz asó schümma seng di tritt von vichar boda nètt soin in bintarslaf, ’z iz allz a getrìtzla, ploazbegela bodase aukraützarn.
Vor a khutta djar, saitma gånt pa balt pan bintar lai zo nemma ’z holtz zoa zo bèrmase, haüt geatmada zo “spilase"... Gian pinn snearoaf hoastzese "nordikwalking"... ’z iz allz gebèkslt.
S.u.W
Trentino, Di Sait vo Lusérn, venerdì 03 febbraio 2017