’Z soinda ågeheft di arbatn zo macha au da lång pista
È cominciata in questi giorni la seconda fase dei lavori della ciclopedonale Folgaria - Asiago dopo la pausa invernale. È forse il momento più delicato perché prevede lo spostamento dei tralicci che portano l'energia elettrica a Luserna per fare spazio alla pista. La nuova ciclabile lunga 70 km - se realizzata in tempi brevi - potrebbe essere il fiore all'occhiello dell'offerta turistica degli Altipiani Cimbri, considerato il crescente numero degli amanti del rampichino e dell'escursionismo in montagna.
Berda in dise lestn tang iz gånt au pa bege vo Milegrùam bart sichar håm gesekk ke au nåmp dar khear bodada iz dar bege boda vüart in pa Frèttle, soinda ploaz ruspe un månnen boda arbatn bahémme zo traga di pilü von elètriko a migele innbart zuar in balt: est soinsa defàtti kartza nåmp in bege. Pròpio sèmm defàtti mochata pasàrn da lång ciclopedonale boda bart åpintn da Zimbar Hoachebene pitt Slege. Vo disan prodjèkt redetmasan sidar zbölf djar, benn da earst bòtta di aministratzióngen von kamöundar affon konfì von Trentino håm gitrofft di bürgarmaistarn von sèllnen von Veneto affon Tèrmar zo macha auz di sachandarn boda hebat gihatt prevédart dar “Accordo Dellai-Galan”. In sèll djar, defàtti, di zboa vorsìtzarn vo dar Provìntz vo Tria un vo dar Redjón Veneto håm gihatt detzìdart ke alle di kamöundar bodase vennen affon konfì håm gihatt rècht zo haba mearar gèlt auzzorichta di mistìarn boda beratn gest starch vürzotraga di ekonomìa vo disa earde vort bait von groazan stattn. Umman vo diese prodjèkte iz gest pròpio da lång ciclopedonale boda vo Folgràit mochat rivan fin ka Slege. A groaza òpera, pensàrt zo untarstütza un vürzotraga in turìsmo vo spòrt. Dar bege, zo macha pinn rat odar zo vuaz, bart khostn benn dar bart soin verte, eppaz az bi zen mildjü euro. Dar prodjèkt gimacht von Studio Nexteco un von Studio 3E iz khennt augitoalt in drai lotti. Di arbatn ågiheft disan månat soin von zboate lotto un iz dar sèll boda von platz vo Lusérn geat fin durch affon khlumma sea vo Robån. Pinn rat bartma gian au pa bege von Ekh un, girift zöbrest, bartma mochan gian übar in bege von Pön zoa zo maga tretn af di bisan von Kraütz. Vo sèmm fin af di Hütt von Zom di pista bart loavan auz nå in bege, stianante hèrta af da recht. Dena di pista bart gian an åndra bòtta übar in bege zoa zo nemma 'z staigele von Frèttle, fin zo springa auz ka dar khesar von Untarmilegrùam. Sèmm bartma loavan auz pa kampìgl fin kan trintschèe un bidar nidar zuar in Frattn, in Bisele un zuar Robån. Di ciclopedonale bart sichar soin eppaz gåntz bichte vor Lusérn un da Zimbar Hoachebene: ploaze laüt khennenaz defàtti vor di schümman beng zo macha pinn rat un zo vuaz un an ratbege boda geat vo Folgràit fin ka Slege bart sichar tüan öffe åndre türn vor in turìsmo.
AvT
Trentino, Di Sait vo Lusérn, venerdì 21 aprile 2017