Sèmm züntrest dar Tuvar
tiaf inn in balt,
lemda simm menndla,
da soin khlumma, luste un alt.

Haüt giansa at di arbat,
zo saga um di èlbar.
Du magastze höarn trottln
attn bege pinn gelbarn.

Dar Seppl pringt zuar raisla,
at di bis gåntz alùmma.
Dar arbatet bintsche,
dar iz kartza khlumma.

Dar Slenklar un dar Snüdrar
prèchan ’z holtz pittn pail.
Da boróatn di ordénje,
da nützan di vail.

Dar Snachlar, pittnan ginar
khüzt azpe biar:
"I trase i di drülln,
i pinn starch azpe a stiar!"

Baz khöbar von Vurtzar?
Dar izzt vasöln un trinkht boi.
Da böllnen nèt nåmp,
dar stinkht azpe a sboi.

Dar Bizzar un dar Bruntlar
nützan di sage,
Ach!! Da arbatn nèt vil,
da straitn in gåntz tage.

’Z geata oine di sunn.
Dar tage iz est auz.
Di simmmenndla khearnmüade
bodrùmm in soi haus.

Sneabaiz, sèmm in haüsle,
hatt boróatet di tschoi:
simm pièttla, simm tètzla
un simm bòtzan boi.

Da vüllnen in pauch
pitt pult un kavrìtz,
da soin asó luste
da khontàrnen di vitz.

Da èzzan, da trinkhan
da tåntzan, da springen,
da spiln kartn un schach.
Da lachan, da singen.

Dar abasstèrn glenzt,
Zuar khinta di nacht.
Di menndla von balt
khön alln: “gottanacht”.

Rosa von Balìn