Dar Luca un dar Gianni khönsaz baz sa håm in sinnt zo tüana azza hettatn zo vintzra di eletziongen

Luserna è fra i centoquarantadue Comuni trentini che domenica 10 maggio chiamerà i sui cittadini alle elezioni comunali 2015, per eleggere il nuovo Sindaco ed il Consiglio.

An sunta atz 10 vo màdjo di laüt vo 142 Kamoündar vodar Provintz vo Tria bartn soin gerüaft zo giana zo votàra zo vornaügra Pürgermaistar un Konsìldje. Lusérn bart zornirn soin naüge pürgermaistar zbisnen zboa kandidètt un zboa liste: “Burtzan” von Luca Nicolussi Paolaz; un “Lusérn lebet – Luserna vive” von Gianni Nicolussi Zaiga. Bar håm eppaz gevorst poan.

Baz hattar in sint zo tüana azzar hettat zo vintzra?

GNZ: In dise lestn bochan habar auzgètt ünsar progråmm in famìldje: vor earst böllapar vürtrang, pittar hilfe vodar Provintz, prodjèkte boda trang arbat asó azta di laüt mang lem in lånt, an zentrum vo “telelavoro” beratz daz peste. Bar bölln machan verte in bèrkhstattplatz un gem zo zis in Ponte Radio zoa azzar mage khemmen genützt auzohalta in turismo vo Lusérn. Bar bartn gian vürsnen zo geba ‘z gehültz in altn un in krånkhan. Vor ditza böllbar håm an pezzarn serviztio von dokhtur un von infermiarn atz Lusérn. Bar bartn richtn her mearare plètz vor di aute un rivan au alle di arbatn boda soin zo tüana afte beng

LNP: Bar bölln machan verte di arbatn von acquedotto; sa est sparbar 4000 euro affon månat schiar 50.000 atz djar, bobar bartn nützan vor di laüt. Bar soinaz sa gemövart zo maga håm an rikòvero vor di altn nicht betar baz Lavrou. Vor di djungen barpar vornaügarn in spòrtplatz inn in di Pön un machan naüge plètz vor di aute semm attavorå. Verte in acquedotto barpar richtn in platz un di beng. Bar süachan zo maga aunemmen åndre zboa laüt vor in CUP. Pinn “gestioni associate” barpar sichar pezzarn di sachandar vodar aministratziong von Kamou.

Ber barta soin in Djunta?

LNP: Alle biar soin boroatet zo tüana allz; schümma beratz no håm in gelaichege asesór vor di offentlesche arbatn zo maga giana vür ena zo vorliara zait. A naügez mentsch magat inntretn azpe zboate asesór.

GNZ: Ünsarna skuadra o iz sa boroatet: bar håm in sint zo lega azpe Vitzepürgarmaistar in Luigi Nicolussi Castellan, sa pürgermaistar vor ettlane djar, boda bart soin in Kamou alle morgas. I azpe Pürgamaistar bart auvarkhemmen vo Trìa drai vert atti boch. Bar böllatn zboa asesör un fra dise sichar ummaz bart soin a baibe, nå in preferentze.

Baz barta khemmen getånt vor ünsarna zung un kultur?

LNP: Biar bartn sichar vürgian zo halta au in prodjèkt afti zimbarzung pittar schual vo Lusérn, augelekk no ’z djar 2011. Pinn Khlummane Lustege Tritt bar soin gest guat auzohalta di zung fra in khindarn. ’Z djar 2010 di khindar soin gest 3, haüt soinsa 13 un dar prodjèkt iz üntarstützt vodar Provintz sèlbart. Dopo böllbar azta ünsarna earde rede azpe biar: di maur von Kamou, geschribet azpe biar, iz khent argenump an hauf vert von turìstn kurdjosat zo vorstiana bia un baz.

GNZ: Dar Komou bart mochan stian nempar in feråine von lånt; azza håm mångl vo kontribute di Aministratziong bart mochan respundarn bahemme zoa azza mang gian vürsnen pinn prodjètte. Bar bölln sicharn azta auzgea “Dar Fòldjo” geschribet azpe biar un haltn au di traditziongen vo Lusérn. Vor bazta nå geat dar zung böllapar höarn gerade von laüt baz sa håm mångl.

Andrea Zotti