Una gara molto tosta, ripagata però dagli scorci e dalla location davvero notevole” è il commento degli altleti al traguardo della X-33KMAN, la gara di triathlon che chiude l'estate sportiva sull'Alpe Cimbra e che ha visto sfidarsi numerosi atleti su un tracciato davvero impegnativo: 1 km di nuoto nel lago di Lavarone, 30 km in mountain bike tra i boschi 7 km di corsa finale.

Da Zimbar Hoachebene, azpe bar hèrta khön, iz an earde boda parirt soin gemacht vor in spòrt. Nètt lai di gekhennatn spòrt vo pèrge, ma åndre boda håm zo tüana insimanai pinn gesbimma. Atz Lavrou iztase gehaltet da viarte editziong von Triathlon, da bichtege gara Tri Week Lavarone 2016. Dar sea vo Lavrou un di beldar vo Lusérn soin alóra bidar khent zornirt vor a schümmana manifestaztiong boda, di vorgånnatn såntza un sunta, hatt zuargerüaft ploaz loavar vor in Tri Week Lavarone, a gara vo traithlon boda hatt gesek mearar baz draihundart atlete sbimmen, gian pinn rat un loavan, allz nå un nå åna nia auzohaltase. Azpe dar alle bartet vorstian, tüan asó eppaz iz nètt dèstar umbromm zo macha dise drai sport panåndar mochtma soin guat zo boroata alle di muskln von laip, un darzuar lirnen tèknike boda nètt magatn stian panåndar, ummaz iz sbimmen defatti, a gåntzez åndarz sachan iz gian pinn rat odar loavan. Vor easrt di loavar håm gemacht simmhundart un draitzekh mètre sbimmante in sea vo Lavrou, dena draitzekh kilòmetre pinn rat zuar Lusérn – ma hatt defatti gemak seng di atlete untar 'z lånt, nå in staigele von lånngez untar in Platz un dar Kirch – un lai drau simm kilometre loavante zo vuaz, bèkslante lai di schua. Giacomo Bertolami, Luca Pizzighella, Alessio Volani un da djung Sara Tavecchio soin lai a drai von gekhennatn loavar boda ditza djar o håm zornìrt zo khemma afta Zimbar Haochebene vor disa schümamma un bichtega gara. Di manifestaziong iz khent augelekk, azpe di vorgånnatn summar, von veroin 33 Trentini Triathlon, panåndar pittar Apt vodar Zimbar Haochebene un di Kamoündar vo Lavrou un Lusérn. Bintsche spòrt azpe disar gem zuar in loavar z’ sega un zo vorstiana di natur von plètz boda gian zo loava. In ditza ünsarna hoachebene iz daz peste boda mage soin.
(AvT)