’Z Kristkhinn vo Praga, odar pezzar, ’z Kristkhinn von Bèrtele, iz khent gestolt di earstn tang von herbestmånat (furse in di nacht von 4 attn 5) un ditza hatt getånt ånt nèt lai dar ünsarn Aurelia, boda haltet rinkuràrt ’z pillele vo S. Rocco, un in tetschnar, ma alln in lusérnar o. ’Z Bèrtele, boda vo djung in Boemia hatt hèrta gepetet vorò in Kristkhinn vo Praga, vor zbuantzekh djar, hatt gevorst dar Aurelia azzar helf ummaz zo khoava, zoa zo schenkaz in lånt vo Lusérn un zo legaz inn in Pillele vo San Rocco. Asó hatze getånt di Aurelia, si iz gånt atz Lavròu un hattz geschaft. Benn ’z iz gerift, untar in piedistàll izta khent gelekk a plèttle drau pinn nåm von Bèrtele un ’z djar. At Zimbar Earde von 17 von herbestmånat, dopo habante khött ke ’z Kristkhinn iz gest khent gestolt, dar ünsar Matteo hatt gespèrrt in servitzio khödante “un üs steataz nicht åndarst baz zo sperara ke daz alt Kristkhinn vo Praga mage palle khearn bodrùmm in soi platz„. Boll biane håmda no gegloabet, ma asó iz gest: benn an såntzta mòrgan vorò in haus vodar Aurelia izze gemacht an kroaz laüt, niamat hatt pensart ke di Mariella un di Fiorella håm djüsto gehatt gevuntet ’z Kristikhinn. Eparummaz pa dar nacht hatz gehatt gelatt nåmp in holtz vo dar Aurelia. Ber daz hatt gehatt vortgetrakk hatt vortgenump ’z plèttle un …bazta vürizkhent boaztz lai ditza mentsch. A mentsch boda hatt gebizzt bo zo legaz zoa azmaz venn ombròmm ’z boast ke ’z pillele vo San Rocco un allz bazta drinn iz khint rinkuràrt vo dar ünsar Aurelia. ’Z gevalltaz pensàrn ke au hoach Eparùmmaz hatten geredet.