Pensa, ma fallo in silenzio, non voglio che nemmeno le tue parole mi tocchino. Non ti permetterò più di toccarmi, non con le mani chiuse a pugno, non con i tuoi giudizi, non con la tua falsa ironia con cui denigravi me e le cose che facevo. Con il tuo paternalismo. Tu non devi toccarmi.

Dar vünfunzbuantzekh von bintmånat iz a bichtegar tage, vor di baibar, ma no mearar vor di månnen, ’z iz dar internatzionàlege tage kontro in sèlln boda nistln di baibar, boda tüan bea in baibar, boda töatn di baibar. Vil khinta geredet übar ditza, ma kartza vil gian vür zo khöda ke ’z iz nèt bar, ke di baibar khemmen nèt getöatet ombrómm ’z soinz baibar, ma vor vil åndre sachandar; anvétze iz hoatar ormai ke ’z iz asó, siånka azmaz nèt bill seng, ’z soinda månnen boda töatn di baibar, lai ombrómm ’z soinz baibar, un håm an uantzega schult: nèt bölln soin vornìchtet von månnen.
Sisto, ’z iz asó, du tarfstme nèt tokàrn. A tiabas a bòtta soinz di hent, di pünk, di kenk, åndre vert soinz di börtar, daz sèll bodo khüst, daz sèll bodo gloabest vo miar. Ma ’z iz ke du tarfstme nèt tokàrn!
Azze hån an khurtzan konzótt, an gåntz khurtzan konzótt, an konzótt kartza, ma kartza khurtz. Azze ummar gea machante gian durch un her di hüff, gekrablt au aft moine hoachan takkn, kartza hoach z’soina dèstar, ma miar gevalltzmar asó. Beh du tarfstme nèt tokàrn. Azze ålege a baiza foat pitt saide, ke daz baiz lazzt innseng allz bizzansaz alle, un i o boazez. Azzemar smürbe sber di oang sa in aldar vrüa. Azzemar lazz krescharn di har lång un machmarse vèrm biondat azpe Marylin, azzede åschauge auz pa bege, azze magàre skitzdar an öagle, azzeme khear antånto azze vortgea zo schaugadar nå un machtar a squintzegada; èkko du tarfstme nèt tokàrn.
Azzemar ålege an konzótt lång sin afte vüaz. Azze ålege lai gummane schua. Azzemar innmudl di har in khopftuach. Azze pinn menndlich, vil menndlich, kartza menndlich. Azze nèt hån lust zo stiana untar dar fresùr vor urn un urn, azze pinn trege un lege njånka an skritzegar varbe afte trialn, azta dar rossétto gevalltmar nèt. Azzeme pinn boràtet, palle, odar spet, odar azzeme nia pinn boràtet, odar i pinme boràtet zboa un drai vert o. Azze hån gehatt a khinn vo zbuantzekh djar, odar azze hettat di djar zo habanar drai odar viare, ma i hån khummane. Azze arbat hèrta sin mittanacht, odar azze arbat lai in haus, moi månn, moine khindar soin moi arbat.
Sisto, du tarfstme nèt tokàrn.
Azze pinn a khöstle kartza voazt, ombrómm i hån a pizzle djar mearar, azze pinn magar, azze pinn gemegart ombrómm i pinn gestånt alumma. Azzede hån gelatt.
Du tarfstme nèt tokàrn.
Übarlege. Tüaz, ma åna zo reda almånko vor a pizzle.
Übarlege aftz allz daz sèll boda moi laip trakken nå alle tage, gloabe basto bill ma sbaige. I bill nèt soin tokàrt vo diar, von doin hent, von doin börtar. Nia!
Du tarfstme nèt tokarn.
Un asto pist a baibe, gedenkhtar ke moi laip iz hèrta dar doi o.

Andrea Nicolussi Golo