Haür o, azpe ’z khint vür sidar vünf vert, izta khent gevairt dar “Gebìnn Tönle Bintarn„. Zbölve in allz di arbatn boda soin zuargerift, vünve vo Lusérn, vünve von Draitza Kamoündar un zboa von Simm Kamoündar. An såntzta 20 von madjo, di drai in tages, da untarsala von Kulturinstitut iz gest voll pitt laüt, di sèlln boda håm geschribet un vil åndre boda zuar soin khent vodar gånzarn Zimbar Hoachebene zoa zo vaira alle pittnåndar. Diese di pestn arbatn in di drai zimbarn zungen:
- Lusérn: Dar beata, geschribet vodar Sabrina Mosele;
- Simm Kamoündar: Bénne an sbaighe khödet mèeront bon hundart böortarn, geschribet vo Gian Pietro Slaviero Skalo, Maria Vittoria Cunico, Paolo Martello Katarnun, Ilaria Spagnolo Spagnöl e Lauro Tondello  Plözar;
- Draitza Kamoündar: Gapaita, geschribet vo Bruno Corradi. Von khindar vodar untarschual hatta gebunnt dar Mattia Nicolussi Rossi pitt Khindar gebiaga.
Dar Kulturinstitut hatt darkhennt eppaz alln in åndarn o boda håm geschribet. An lestn di “Pistonieri dell’Abbazia” håm gevairt pitt soine groaze, sbere, starche pistolü. Bar paitnaz alle an åndarz djar.