Pan bintar steatma daz meararste inngespèrrt in haus, ma benn 'z khinta dar långez alle di laüt von ünsar lentle hevan bidar å zo leba auzzalt in guat air. Balda zorgéat dar snea daz earst von alln geatma nå radìkkn (tarassaco), khèrndla (silene) un a pizzle spetar makma aulesan hummargekraüt (spinacio selvatico), pappln (malva) un kontémparn (acetosa). 'Z soinz alle gresar bo ma mage èzzan roage odar gekhocht. In månat vo abrél alle soin in di èkhar zo kheara au di earde un di basan odar auz pa bisan auzolesa mörch (morchella) un kroazsbemm (Calocybe gambosa). Di månnen gian bidar in balt zo macha au holtz zo bohüatase vor in bintar bo da bart khemmen. Di kapardjöln khemmen auz von balt z’èzza di baizan semplüambla bo da auspitzarn in daz vrisch gras un in pa pèrng plüanda di schüzz, bo da se spèrrn vor da khint daz schaüla bèttar un tüanse bidar offe pittar sunn. In madjo magatz snaim o, un i hån no gehöart khön ditza: "az 'z snaibet in madjo, gitzt höbe un khlea". ’Z khearnda bodrùmm di sbalbln bo da håm auzgetrakk in bintar in Africa un machan 'z èst hèrta untar in gelàichege tach. Dar kukko heft å zo singa un benn den höarst, asto hast gèlt in di gadjòff, mochstoz ågraivan, asó barstosan håm vor daz gåntz djar. Di bisan soin alle gel von pipakån un benn da khemmen baiz, un flattarnda ummar di sem, khintmar in sint baz da hatt khött moi nona: "pipakåna gel un baiz, asto nètt faifst, djukhede nidar in prunn un ziade neméar au, ummaz, zboa, drai". Di khindar stian bidar auz zo spila fin atti ur vodar tschoi, di tang soin lengar un iz asò schümma höarn di klokkn von kampanìl, boda laütn di achte abas, no au pittar sunn. Auz pa tage steatma gerècht un iz nètt kartza barm, ma hatt liacht vo morgas fin daz abas, ma mage auzstian in guat air un pa dar nacht slaftma in di vrisch. Benn 'z macht disa schümma zait, ünsar lentle iz dar peste platz vo dar bèlt bo ma mage lem!