vita trentina, domenica 2 settembre 2012, pag. 18

NÈTT ALLE BÖLLN AN BETRARN BEGE

Dar Laas ziaget her aniaglaz djar ploaz turistn bo den machan pin rat

La notizia dell'imminente inizio del lavori di allargamento della strada provinciale 133 “del Menador” ha scatenato su Internet un acceso dibattito sul forte richiamo turistico di questa panoramica via di collegamento tra la Valsugana e gli Altipiani Cimbri. Infatti, secondo l'opinione di molti ciclisti e bikers, la rettificazione e la messa in sicurezza della strada andrebbero ad incidere negativamente sul particolare fascino di questa antica mulattiera militare.

Summar, zait vo ferie, bo da bill munen gian ummmar, rastn, machan sport. In a bort: turismo.

In ünsarna provintz di stadjong vo haür iz gånt girecht. Darnå an sunjo ågiheft malamentar pitt 'nan starchan kalo vo presentze ågipuntet pittar krisi un pitt daz schaüla bettar, ludjo un agosto soin gånt vür gåntz pezzar, tragante her a bolta segno turistn.

Asó bi' bar sà bizzan, vill laüt zornir ünsarna earde vor di ferie vor allz daz sèll bo da da iz z'sega, zo maga rastn in di rue, un zo macha sport: ummar zo vuaz pa staigela, krabln au pa perng, machan rafting, gian pinn rat, un ploaz åndarst bo da biar bo bar lem da bizzan neånka.

Zo vorstianasan mearar vo baz ziaget da di laüt iz ginumma süachan aft internet, z'sega baz da di turistn bo da da soin gest da sraim, kontàrn, un zoang, in tschelln. Tüanante asó darvertma sachandar bo ma hebat nia pensàrt: az bi ploaz site bo dar reng von staigele von "Tritt von Sambinélo" odar von plètz von sbèmm in di beldar von Hoachebene. Ma di meararst djukhan drau af di siti ploaz foto un video von bege von Laas, gimacht pinn rat.

Zo macha almeno a botta in lem in Kaiserjägerweg schupfante afti pedéln, khemmensa her vo dar gåntzan Europa: belesan, taütsche, olandesan un frantschesan o, bo da khön un sraim ke disar bege iz ummana von pestn pontàrn von Beleslånt, nåmp in selnen von Giava, von Giau un von Duran. Ummandar sraibet ke dar hatt gimacht in Laas pin rat sà ununviartzekh vert, åna nonet zo håbaz dartånt in mindar baz an ur, an åndar khütt ke dar peste tòko iz dar sèll zöbrest, dar stìklarste.

Un baz gloamda alle dise ratfarar von naüng arbatn bo da bart khemmen gimacht affon bege? Vo benn di djornéln håm gett di notitzia, iz allz a gitschèkkla aft ploaz forum online. "Dar Laas iz a pontàr bo da dar macht spaim in stoap auz von maul, un auvardjukhan di polmü" - sraibet Enrico vo Bologna - "I pinn a ratfarar un nètt ummandar bo da nützt in auto, un vor ditza tüatmar ånt bizza ke ma bart åhevan z'arbatada drau, umbromm asó barta soin hèrta mearar platz vor di aute bo da stinkhan un mindar vor 'z gisbitza von sèlnen vo da augian pinn rat." A par ummaz, un fra dise trianar o, gian nidar hertar, vorsante asta dar bege khém gischützt alz bene storico o.

Beratz djüst vor di laüt von pèrge lazzan vorlìarn dise arbatn vor daz sèll bo da khön di turistn? Makma no paitn zo betra in Laas? Bia bartz gian zo giriva pitt disan turismo? Anìaglaz hatt soi idea.