Seguitare a sperare quando la speranza finisce; quale miglior augurio per un altro anno? 

Est boda di vairta soin alle vorgånnt un afte pèrng izta gestånt lai dar bintar, gevrort un tunkhl, est khinta di zait bidar zo plüana. Ja, i boazez boll, nèt hèrta habar lust auzzodarbekha von sèll lång slaf bodaz innmudlt dar bintar, nèt hèrta habar lust zo loava bidar nå in lem, a gegiana hintar un vür hèrta naüge un in da gelaichege zait hèrta alt. A geloava boda mearare vert parir soin ena vèrt, ena khumman ort. Ma i gloabe ke bar schöllatn soin guat zo halta kunt vo disarn fadige, von stoap bodaz iz gevallt afte aksln un bobar nèt soin guat vortzoputza, åna zo lazzanaz darbissan vodar vort. Dar stoap afte löapar steata nèt lång, pinn earst slavadjo khintar lai vortgebèscht un di staudn glentzegen bidar azpe naüge, bar schöllatn lirnen von balt, un aniaglaz naügez djar soin guat zo stoapa abe ünsar lem von stoap von bintar, vodar fadige vo alle tage. Sichar, 'z berat gevelt gloam zo maga khemmen alle djar bidar naüge; 'z khintmar in sint, ke di djaponesan zo richta di vasan nützan a teknika gehoazt "kintsugi" boda lazzt seng alle di khlüft, da nützan kòla gevèrbet pitt silbar un golt, asó zoangsa alln, un vor hèrta, bo da soin gest geprocht. A vaso gerichtet iz azpe 'z lem vo aniaglaz, pitt alln soin prüch, pitt soin gevelatn beng, gemacht un gekheart zo macha, pinn vallar, pinn schèrbar afte khnia, pinn zèrr in di pruach un in di seal. 'Z iz vo disan krètz boma darkhennt ke 'z lem iz khent gelebet, bar schöllatnaz nèt schemen zo zoaga zo haba gelebet. 

In ditzembre hånne gesek di bòkkln vo Boinichtn plüaenen un est paite in earstn sneaklökkla, paitn iz lem, paitn daz sèll bomen nèt impaitet, paitn åna vort daz guat un daz letz, balma nemear sait guat zo paita heftma å z'stèrba. Paitn iz håm hundart djar un setzan an ölpuam sichar zo seganen no plüaenen, paitn iz innvülln in kaltro pitt patàtn un di tetsch pitt holtz ombromm dar bintar bart soin lång ma dar bartaz nèt darbissan ena azpar soin boroatet. In ditza armez Beleschlånt, boda niamat mear paitet nicht, boda tage vor tage allz geat vorlort, vor 'z djar 2015 auguraraz z'soina no guat zo paita azta plüanenen di sneaklökkla un zo bundranaz balda daz earst röasle spitzart tortemitt in snea. Paitn ena nia zo khemma loune, ombromm di zait genützt zo paita iz di zait boda macht raich 'z lem. In di bèlt izta nèt lai letzez, ma daz guat muchtma soin guat zo süachasen un paitn az vürkhemm. 

(ang)

l'Adige, di Sait vo Lusérn, venerdì 16 gennaio 2015, pag. 28