Khindar, schual un zungen, hèrta mearar zungen... hèrta mindar khindar, ma disa iz an åndra stòrdja, furse nèt sa geschribet.

Di bèlt iz khent, in dise lestn djar, khlümmanar baz nia, di laüt bizzan ke, in an uantzengen tage viazo mangsa rivan bobrall, insinamai züntrest dar Australia. Un darzuar soinsa hèrta mearar di sèlnen boda khemmen in ünsarne lentar vo auz. Asó, lirnen di zungen von åndarn iz khent eppaz boma mocht tüan, nèt boma schöllat tüan; alle tage di djungen khemmenda drau sèlbart ke, azza nèt khånen di zungen iz malamentar vennen arbat insinamai azpe kamerìar odar in a geschèft zo vorkhoava geplèttra. Haltante kunt pròpio von zaitn bobar soin drå zo leba, di Provintz vo Tria, von djar boda khint hatt augelekk in prodjèkt "Trentino trilingue" boda bill innvüarn in di schual daz taütsch un daz inglésch nemear lai azpe zung zo lirna, ma azpe zung genützt zo lirna åndre sachandar: geografia, stòrdja, odar magare zo macha ginastika un disenjo. Allz ditza sa von earstn djar vodar untarschual un vür sin azta iz verte da obarschual. Nèt alle soin kontent, ettlane profesör khön ke da soin nonet boroatet vor an söttan sbern tritt un ke ma tarfat paitn azta allz sai inngerichtet an pestn. Furse di sèlln profesör håm nonet vorstånt ke ma hatt sa gepitet kartza vil un ke in Beleschlånt niamat khennt di zungen un ke asó makma nèt gian vür. Un da Zimbarzung? In di schual vo Lavrou, pròpio ombromm 'z soinda di khindar vodar zimbar zungmindarhait ditza, zo lirna åndre matèrie atz taütsch odar inglésch, khint sa getånt sidar acht djar un est di schual vinntze pinn earstn un tarft tüan gåntz biane zo legase a pòst. Vor ditza schöllataz khemmen khött Vorgèllz Gott; ja vorgèllz Gott pròpio ünsåndarn bobar ren zimbar. Un di Muatarzung von lusérnar, vorsemar bidar, bartze vennen soin platz? Niamat bartaz nia khön Vorgèllz Gott ma sichar eppaz mearar mochtaz khemmen darkhennt, nèt lai ombromm asó khütta di ledje 6 von 2008 vodar Provìntz, ma ombromm 'z iz hoatar vor alle ke lirnen mearare zungen macht raichar un helft in lem. Bia makma pensàrn zo lirna di zungen von åndarn azma nèt hatt in hèrtz di zung boda håm geredet ünsarne eltarn vor mearar baz tausankh djar, bia makmaz pensàrn? Dar kamou vo Lusérn pittnåndar pinn Kulturinstitut hatt sa übarlekk zo macha lirnen azpe biar in khindarn von Khlummane Lustegen Tritt ma mucht est süachan azta daz sèll bosa aunemmen gea vorlort balza gian ka schual.

(ang)