Romài sàitmase gebont, ke durch in Cina sòinda ploaz affarìste un impresàrdje, bódase leng zo kopiàra alla dar sòrt, geplèttra, taüre schakòtzan, telefonìn, ordénje un kisà baz allz åndarst no. Ma ùmmana von naügarstn nòve, bodaz zuarsoingerìft in di vorgånnatn månat vo durch sèmm, parìrt z'soina no strembatar baz zèrte visióngen von arm Barba Lin sèlbart. 

Ke in ta vo haüt rìvanda zuar laüt, boda abenemmen gåntze lentla pitt soin fotokåmere, ditza sebarz alle tage, ma ke dena bintsche zait dise lentla vénntmaze augemacht vo naügom durch in Cina, ditza furse beratarsanen nia empìtet njånka er, dar arm Barba Lin. 

Pròpio asó iz auvarkhénnt pitt Hallstatt, a khlummaz lentle vo achthundart laüt in di pèrng au in Östarraich; sèmm, vor a par djar, soinda zuargånt a khutta Cinésan, boda håm gemàcht ploaz foto un disénje von beng, von haüsar un von plètz. Un dena ? zait a djerle ? a groaza cinésega firma hatt augemacht a gelaichega kòpia vo Hallstatt durch in di provìntz vo Guangdong, nidar in sud vo dar Cina. Bia nå? Au zo richta a kòpia vonan östarraichar lentle durch in Cina, muchtma nèt soin lai gåntz auz pa faschìn? Sichar nèt sovl, balmen vürstéllt, ke dar ditta, boda hatt getånt ditza, izzar khennt zo khosta mearar baz an halm milldjàrdo Euro! In dise lestn diardar, richtn auz haüsar odar lai gåntze quartìarn in stile vo fremmege fölk, iz khennt z'soina a mòda durch in Cina. Asó, ånka, azma nonet hatt gehàtt gesék kopiàrt a gåntzez lånt hattz auzgesek hoatar, ke ma mak speràrn zo macha an guatn affàr darmìtt. Di haüsar kopiàrt vo Hallstatt soin nèt khennt augemacht vor arme laüt, di sèlln haüsar khostn drai vert sovl baz di djüstn in alt lentle vo Hallstatt. Biane cinesan dunque bartn mang lem in sött haüsar. Åntze, insinamai di raichan parìrn machan fadige zo khoavase di sèlln apartaméntn. Vil quartìarn in frémmegen stile, boda au soin khennt hergerìchtet pellar baz daz naüge Hallstatt, gelàichan mearar in stattn von gaistarn baz in gestékhatn metropòle, bobar alle khennen vo durch sèm. Un ditza sichar nèt umbrómm di lentla beratn khennt kopiàrt letz; zoa zo perfetzionàra di illusióng durch in naüge Hallstatt, håmsa parschin augemacht vo naügom in kampanìll un di khirch, ånka azpar gloam ke di bart khemmen genützt bintsche. Dar groaz problèma steat an åndadar; 'z iz allz ummaz biavl gèlt un arbat ma lekta drinn, zo kopiàra a lentle azpe Hallstatt, daz sèll boma, nèt sait guat un furse nia bart soin guat zo kopìara, soinz di schümmanen pèrng, dar guat air, da groaz natùr un stòrdja, boda gehöarn ünsarn lentar. In da naüge Hallstatt, di natùr un dar air bartn hèrta sitan dio sèlln vodar Cina un nèt von Östarraichan pèrng, nidar nåmp dar naüng Hallstatt steata da groaz statt vo Boluo, pitt schiar an milldjù laüt un ploaza sbera industrìa ummenùm. 

Armin Cont

l'Adige, di Sait vo Lusérn, venerdì 20 febbraio 2015, pag. 29