Tradizioni - In tanti bambini e adulti riscoprono il divertente gioco di Pasquetta
Sidar hèrta, ka Oastarn, khemmenda geschenkht di öala, djüste von hennen un söllane, no güatar vor di khindar, pitt tscokolàta. Ena zo giana z'ziaga auz di Edjitzié bodase håm gehaltet soin a khlummana bèlt, boda drinn haltet allz bazdada bill soin vor 'z lem; bazzar, earde, air un vaür, i böllat lai gedenkhan moi nona bodamar hèrta hatt gemacht èzzan, balde pin gånt vort pittar schual auz von lånt, a gesmèttratz öale ombromm, azó hattze khött, 'z hettatmar gehaltet ka hertz in gåntz tage bida ånka dar vormaz in sèkkle hettatmar nèt gevallt. I much khön ke 'z iz gest azó, furse ombromm, darzua in öale, hattzemar hèrta någètt an halm tschopù vodar Ida, daz peste proat bode hån gèzzt in moi lem. Kan oastarn anvetze, pitt moin nono, di öala habarse hèrta gevèrbet in grass von tschovölln un dena, in oastarnmenta, habarda drinngezoget pittnan sòldo. Azó, balzamar håm gevorst zo helva in khindar zo vèrba di öala in såntza vor Oastarn un zo legase au z'ziagada drinn in menta darnå, hånne lai khött vo ja. Dise èrbatla soin khent lai hèrta vürgetrakk vodar bibliotekàrdja, est iz a par djar bodar nåhelft dar Toalkamou pittn prodjèkte "Vennbaraz in famildja" un "Famildje Spiln". In såntzta in di bibliotèk, soinda zuarkhent mearar baz zbuantzekh khindar, alle pittn eltarn odar pittn non. 'Z soinda khent laüt persin vo Folgràit iar un vo Lavrou, boda nia soin gest atz Lusérn ma boda håm ummargesek di kartéln un håm geböllt vorgian a par urn pitt üs. Pittn öala zo vèrba, habar gehatt boroatet di boll zo macha di pulèstarla un di kart zo macha di zümmala. Azó habar gètt zo tüana alln, di khindar håm daz liabarste gevèrbet, di eltarn soinse gegodart zo hakha auz zümmala ma, übarhaup, zo arbata di boll. In menta darnå saibaraz gevuntet in platz z'ziaga drinn in di öala. Vil khindar un ettlane eltarn, di fremmegen soin gest kurdjosat ombromm da håm nia gehatt gesek ditza spil. Di ünsarn da von lånt, anvetze, khennenz alle obromm 'z iz an alta traditziong bodase nia iz vorlort, saiz ombromm ünsarne altn håm nia vorgèzzt zo "lega au di öala" in khindarn saiz ombromm di Luisa hattze augelekk alle djar in Platz. Bar soin gest ploaze, 'z håmda gespilt khindar un groaze, måmme un tatte, non un none. A månn hatt gehatt persìn di vüchtzekh liare bodar zuarhaltet pròpio ziaga drinn in öala a bòtta atz djar. Di brevarstn però soinz gest di khindar, ma bar bizzanz, da soin hèrta bravat balbar eppaz tüan vor se un vor ditza khobaren alln vorgèllz Gott z'soinada gest disa bòtta o.
Viola Nicolussi Golo
l'Adige, di Sait vo Lusérn, venerdì 17 aprile 2015, pag. 32