Attualità - Riconfermato il sindaco uscente la sua lista risultata vincitrice per un solo voto
'Z iz sa gest tukhla nacht balda durch pa pründle hattma gemak seng di earstn laüt boda, di noüne abas von vorgånnate sunta, tage von eletziongen, soin gånt z' sega auroatn di skède un zo höara berda berat khent zornirt azpe naüge Pürgamaistar vo Lusérn. Niamat però hettaten impitet ke ?z beratn gest drai urn sichar nètt vor di laüt boda håm bea in hèrtz. 197 aft 290 Lusérnar ? 95 baibar un 102 månnen - soin gånt zo votàra an sunta, un sin di lestn minutn hattma nètt gemak vorstian berda hettat gebunnt: an moment hatta gehatt mearane vote dar Luca Nicolussi Paolaz, an minutt spetar dar Gianni Nicolussi Zaiga, boda an lestn hatt vorlort di eletziongen lai vor an voto. Dar Luca Nicolussi Paolaz asó geat vürsnen z'arbata vor Lusérn vor åndre vünf djar.
A söttana eletziong, 98 vote ummandar un 97, dar åndar hattmase furse nia gesek da in ünsar lånt. Di laüt vodar Lista Burtzan boda håm gevånk di mearastn vote soin dar Rudy Nicolussi Golo, 29, un dar Giorgio Nicolussi Neff, 22, boda bartn nemmen toal dar naüng djunta, vo dise vür, defatte dui djunta von khlumman kamoündar bat soin lai vo drai laüt anvetze baz vünve azpe ?z iz gest finn haüt. In Konsìldjo bartna inngian alle di åndarn laüt vodar lista boda håm gevånk genumma vote: dar Mario Nicolussi Zom, 20 vote, di Elda Nicolussi Golo, 16, di Francesca Nicolussi Rossi, 13, dar Fiorello Nicolussi Castellan, 12, di Giulia Nicolussi Castellan, 11. ?Z stianda auz aventze pitt mindar vote dar Gigi Zanon, 9 vote, di Elena Nicolussi Neff, 7, dar Armando Nicolussi Golo, 6, dar Roberto Orempuller, 5, un dar Michele Zatta pitt zboa vote. Vodar lista von Gianni Nicolussi Zaiga ? Lusérn lebet, Luserna vive ? bartnda avetze gian in Konsildjo pitt imen dar luigi Nicolussi Castellan boda hatt gevånk 51 vote, dar Fiorenzo von Kastelé, 26, un di Iole Nicolussi Neff pitt 16 vote. Di åndarn laüt boda soin gest in lista pinn Gianni Nicolussi Zaiga ma boda bartn nètt inntretn in kamou soinz: dar Ginacarlo Nicolussi Moro, pitt 14 vote, dar Walter Nicolussi Zatta, 12, di Fiorella Nicolussi Paolaz, 10, di Alessandra Nicolussi Paolaz, 9, dar Federico Penner, 8, dar Gianni Gasperi, 8, dar Matteo Nicolussi castella, 6, di Augusta Nicolussi castellan, 5, un dar Mirko Verones, er o pitt 5 vote.
Bar håm gehöart di earstn börtar von pürgarmaistar dar Luca Nicolussi Paolaz:
"Daz earst vo alln - khüttar ? böllate haltn panåndar Lusérn un alle di lusérnar, i boaz zo haba gebunnt pinn an uantzegen voto un vo ditza barte haltn kunt, azpe de hån gesüacht zo tüana in di vorgånnatn vünf djar bille soin dar Pürgermaistar vo alln, nètt lai vo bem ?z hattme votart, disan però khüden an hèrtzlichen vorgèll'z Gott. Bar bartn süachan zo arbata an pestn pinn bintsche bodaz iz zuargètt, saiz azpe gèlt, saiz azpe laüt. Sa vo haüt vort però vorhoazaz ke i bart tüan allz bazze mage zoa azta tra vünf djar makta khemmen gemacht an uantzega lista drinn pitt alln in sèllnen boda bölln tüan guatz in lånt"
(AZ)
l'Adige, venerdì 15 maggio 2015, pag.31