A mildjù un zboahundart tausankh; sovl soinsa di telefonàde boda vånk dar CUP in an uantzegez djar. 'Z bill soin gemuant, ke anìaglaz mentsch boda lebet in di Provìntz vo Tria rüaft å in Centro Unico Prenotazioni (CUP) daz mìndarste drai vert in zbölf månat. Ma rüaft å zo vorsa zo khemma någeschauget von an dokhtur, zo macha a parn esåme odar zo venna an platz in khrånkhaus. Dar CUP hatt soin groazarste sètz ka Tria, ma sidar a par djar soindara khent augelekk åndre, khlümmanar, in merare lentar. Di Provìntz vo Tria hatt starch geböllt un untarstützt azta di firma boda nåsteat disarn arbat, di GPI, tüa offe sètz in di teldar bait vort vodar statt zoa azta di laüt mang arbatn sèmm nåmp bosa lem, ena zo mocha pendln hintar un vür. Allz Ditza iz o toal vonan gröazarn prodjèkt boda di Provìntz halteta vil; dar prodjèkt vodar telearbat. Asó, dopo Pieve di Bono, Ossana un Castello Tesino dar CUP, 'z djar 2012, iz gerift atz Lusérn. 

Sidar a par bochan izta khennt inngerichtet a naüngar sètz vor disa bichtega arbat: di sale von Centro Multiservizi inn in di Pönn soin gröazar un destrar vor di sèks baibar ingestèllt, viar lusérnar un zboa lavrounar. Dise baibar arbatn aft turne vo di 4 afti 8 urn affon tage un khemmen abegelirnt zo nütza in komputer, pittnan kurs vo drai månat, augelekk vodar GPI sèlbart no vorsa åhevan z' arbata. Vor di teleàrbat soinda khummane maurn, ne diståntze, dar CUP rift pitt soinar arbat in gåntz Beleschlånt, nètt lai vor di trianar. Drai diarnen, defatti, di Lisa, di Christine un di Giulia nemmen å di telefonàde boda rivan vodar Pronvintz vo Trìa, di åndarn drai, di Angela, di Serena un di Valentina anvetze respundarn vor Verona un soi Provintz. Vor in sètz vo Lusérn hattma in sint zo tüana eppaz gåntz naügez, un bodada iz atz khummane åndre saitn: 'z bartada soin a mentsch boda bart helvan in laüt zo vürzostèllanen visite un esåmi åna åzorüava in nummar von CUP, ?z iz genumma gian sèmm kan diarnen, in soi büró von Pön, khön bazma hatt mångl un in kurtza zait bartma håm bazma hatt ågevorst. 

In biane zait di firma GPI bart instèlln zboa åndre arbatar o, pezzar beratz az soin zboa lusérnar, puam odar diarner boda bartn arbatn vor disan servitzio. Ma boazt nonet gerècht benn ma ke åndre zboa plètz soin sa boroatet zo nütza machtaz pensàrn ke 'z barta nètt vortgian långa zait. 

Andrea Zotti

Di Sait vo Lusérn, l'Adige, 5 giugno 2015, pag. 35