Miar gevaltzmar nèt ren odar schraim vo kriage, kartza vil ren un schraim ena groazan vèrt, haüt però höare zo mocha nidarleng dise zboa börtar zo gedenkha. 
Biavl vert in dise lestn månat habar gehöart khön ke ?z soinz hundart djar; hundart djar von earst schuzz, hundart djar von earst toat, inosmma hundart djar sidar azta iz auzgeprocht daz earst bèltkriage. Bèn, in dise tang, 24 ? 25 agosto soinz di hundart djar von khåmpf von Basü. 
Di belesan kanü håm håntgevånk z'schiaza afte österraichegen fört in khemman dar takh atz 15 von agosto 2015, in tage vodar Lamadonna, dar plån iz gest eppaz groazez, schiazan ena khummana rue vor zen tang nå un nå. Verte z'schiaza di kanü, beratnz gest di fent von 115° zo graiva å afte basü un zuar Kostalta un hèrta di fent von 161° un 162° zuar in Verle, affon Spitz hebantada geschöllt ågraivan di alpìn. Dar generàl Pasquale Oro, boda hatt geschafft, iz gest hoatar; drukhan afte österraichege linee z'zega biavl starch da soin, ne mearar ne mindar. Obromm alora dar ten.kolonèll Rivieri hatt gevüart soine soldàn zo kruatzegase affon stachldrat von schützgrebar untar di schüzz von Maschinengewehr, ombromm? Dar t.k. Rivieri iz gest an altar soldàdo, dar hatt gehatt gemacht viar felzung in Afrika, ma soi kariara est iz gest stekhan un palle beratar gånt in pensiong un Tria iz gest asó nåmp, ma asó nåmp? Baz mai bartnz soin a par hundart odar siånka tausankh toate azma mage khemmen generàl? Nicht in gåntzan, odar nèt? 'Z iz sichar nèt gest dar uantzege, dar Kolonèll Rivieri, zo pensaraz asó un haüt beratz zait azta alle bizzanz. Di unatzegen heldar in a kriage soinz di sèllnen boda khearn dahumam.