A naügar summar hatt ågeheft un pittar earstn hitz soinda gerift di fremmegen aft ünsarne pèrng. I o pin inkånt vodar statt un pin khent au vor a boch kan Kholegen zo vüllamar di polmü pinn guatn air, di oang pinn varm, di nas pinn guat gesmakh vo höbe un balt un di oarn pinn khlång von pèrge: ‘z gevispla von vögela, ‘z gefuka von bint, ‘z gelaüta von khüaschèlln, daz süaz gebètzega von öm un von lempla bodame darbèkhan alle mòrgan...
Ma dise lestn tang, eppaz åndarst hattme darbekht in aldar vrüa: a schaüla gerümbla, azpi vonan roplå, bodase hatt genempart laise laise un iz khent hèrta sterchar... Dar tondrar, hånne pensart no halbe inschlaft, ma a glåstar sunn hattme ågelèchlt frèch vo hintar in koltrìla von vestar. Nò, ‘z iz nèt gest dar tondrar, ma a gåntza khutta motórredar boda soin vürpasart nidar affon stradù, geschozzt azpi khugln vo sklopp. Ja, alle di sümmar ünsarne pèrng, pitt soin stikhln beng voll pitt schümman khearn, lokhan zuar tausankhtar motoraitar vo dar gåntzan Euròpa. In internét iz gestèkht pitt saitn boda zoang di schümmarstn pèss un djöchar von Alpm zo machanen a khear pinn motórrat un gem sinamai å di beng, boma mak gem gaz åna khummana vort z’soina darbischt von pintarn. “Bikers welcome” - asó hèrta mearar birthaüsar khön bolkhent in “turistn aff zboa rodln”, bodase auhaltn eppaz z’èzza un zo trinkha. Sichar, ‘z gèlt stinkht nèt, ma dar tåmpf vo bentzì bol, un disar o, pittnåndar pinn rumor, schedeget di gesundhait von laüt boda lem in di haüsar nå in stradù, un von fremmegen o, boda khemmen aft ünsarne pèrng zo gòdranen di rue un in vrisch air, un sichar nèt z’sega in Superbike vo Imola. Furse atz Lusern disar problem iz mindar gehöart baz in di åndarn lentar von ünsarn hoachebenen: a tiabas a bòtta, z’soina a khlumma lentle auz alumma, izta drå eppaz guatz o. Vorsteatme nèt letz, i hån nicht kontro in motoraitar, almånko nèt kontro in sèlln boda volng in regln von bege. Schade lai, ke dise lestn parirn soin hèrta mindar. In di summarmånat lestma quase alle tage afti fòldje vo epparummaz boden tüat schaüla bea un geat zo geriva in krånkhaus odar sinamai affon vraithof. Vor daz sèll haür o, azpi sa sidar a par djar, di pintar in Südtirol, ma in di Provintz vo Tria o, soin nå zo hüata streng di bichtegarstn pèss un djöchar vodar ünsarn redjóng. I però hån gesek pitt moin oang a khutta motórredar pasàrn durch ‘z lentle von Kholegen pitt schiar 80 - 90 km/h! Un baz khön von sèlln aråntschate hakhstökh boda ausoingespitzart bobrall nå in stradü? Ja, i rede von “speed check”, boda schöllatn mèzzan berda drukht in vuaz kartza vest affon gaz, ma niamat parirt zo machasan vil drauz. Kisà biavl sa håm gekhostet, un übarallz, kisà bisa soin in funtziong? I hån moine zbaivl... I boaz bol ke di fremmegen soin bichte vor di birtschaft von ünsarn lentarn, ma furse beratz zait zo übarlega, baz vor an turismo bar bölln aft ünsarne pèrng. Gottarhear hattaz nèt geschenkt umman von schümmarstn plètz afti bèlt, zoa azparen auzvorkhoavan asó bolvl. 
Paolo Pergher