Grande partecipazione di giovani alla festa dell’equinozio d’autunno

Sichar, az berat gest dar lest schèrtzar, beratz boll zo leganen di “hent in har„; ma ’z iz gest dar lest schèrtzar… von summar, ditza bill muanen ke an åndarz djar barta bidar soin an åndadar … lest schèrtzar, un, halpar, asó vürsnen vor a baila. Obrómm izta khent zornìrt disar nåm: schèrtzan tüanda di khüa; di ünsar altn, però håm hèrta khött ke, “an schèrtzar atz djar machten dar faff o„. Pitt ditza håmsa geböllt muanen ke, ’z mage auzvalln, a tiabas a bòtta, azta aniaglas mentsch, in soi lem, tüa eppaz boda nètt steat proprio å boll.

Vo baz dar Kulturinstitut, pitt dar hilfe von Kulturverein, von Kamou, von Fòierver un von Roat Kraütz, hatt augelekk asó eppaz.
Daz earst von alln zo süacha zo lega panåndar un, laise laise, zo pinta, di djungen lusérnar, nètt lai zoa zo höarase toal vonar gelaichan khlummana schümmana “bèlt„, ma zoa z’soina hèrta meara stoltz (asó hoasta dar per von “lest schèrtzar„) z’ soina a lusérnar.
Eppaz augelekk von djungen (Matteo, Elena un Lucrezia), vor di djungen. A spil bodaz macht khearn hintar in di djar, bodaz macht machan khennen pezzar ünsar lånt, ünsarne laüt un ünsar kultur; allz ditza süachante sachandar vo disedjar in di khèldar un au pa tetschan un gianante ummar zo vorsa, alla darsòrt, in ünsarn eltarn.
Vünfunviarzekh di djungen inngeschribet, augetoalt in zbölf squadre; djunge boda lem in lånt un an hauf åndre lusérnar giströabet in di provintz vo Tria, un nètt lai sèm. Allz hatt ågiheft di zboa un a halbes in tages benn ’z izzen khent gètt dar pefèl pittn sachandar zo süacha un zo tüana; allz in an stroach ’z lånt iz gest voll pitt djunge boda håm giloft duch un her, in un auz von haüsar un, vor ’z iz gest di sèkse abas, dar spòrtplatz von Kulturverein iz gest voll pitt pennen, katzèdrelln, kruang müllela, schèlln, gelbarn un asó vürznen.
Spilante alle pitnåndar di ünsar djungen soin khent zo khenna mearar baz viartzekh börtar vo ordégne, gegrés un vil åndarz boda iz toal vodar ünsar kultùr.
Niamat hatz dartånt zo venna allz, daz sberarste iz gest vennen an barelù un, no sberar, vennen a djüstz vèllele.
An lestn gebùnnt hatta dar gruppo von “Halbe belese„ gemacht von Alessandro, von Devid, vo dar Elisa un von Daniele, vor se viar smartwatch (umman vorùmman); zboate izta gerift dar gruppo “Viar bint„ pitt dar Sara, pinn Walter un pitt soin khindar Lucas un Sophie un dritte dar gruppo “Di maséttnar„ gemacht von Moreno, von Mirko un vo dar Lidia.
Vor alln in djungen inngeschribet a schümma franelele drau pinn per stoltz, a guatz pröatle, eppaz zo trinkha un musìk un getåntza finn daz umma in di nacht.
Bar bölln gearn gloam ke, bazta iz khent ågiheft haür, mage gian vürsnen an åndarz djar o, magare pittnan groazan vairta sa ka långes, mearare trèff auz pann summar un an lestn schèrtzar bidar ka herbest.