L’estate, i giovani e la musica: sembra quasi che Luserna sia il posto ideale dove imparare la musica. Il Guitar Campus è uno workshop intensivo per chitarristi, una full-immersion di musica e chitarra che si tiene ogni estate sulle montagne del Trentino. Le attività sono coordinate dal maestro Lorenzo Frizzera, fondatore della scuola UpDoo, che quest’anno ha scelto Luserna dal 29 giugno al 2 luglio come meta della settimana formativa per i giovani chitarristi provenienti da tutta Italia.  

Di lusérnar soin aromài gibónt z’sega ’z lånt bodase vüllt pitt djunge balda rift dar summar. Lusérn, pitt daz sèll bo ’z hatt un boda khinnt gimacht, ziaget hèrta zuar ploaz khindar, puam un diarnen boda bölln lirnen eppaz naügez. Dar bartet sichar gidenkhan ke vor drai djar nå un nå di toské vodar veròin Liberenote håm hergirichtet in stage Recitarcantando. Vor zboa bochan mearar baz sèchtzekh laüt tra khindar un maistre håm gelekk panåndar a gåntza òpera vo teatro: vo dar stòrdja un vo dar musìk fin afti kantzú un di diàloge, allz naüge un nia gisek odar gihöart vorånahì, zo kontàra eppaz von lånt un vo soine laüt. Njånka khönz, allz iz gest geredet un gesunk azpe biar. A djar spetar di Frau Pèrtega, dar Sambinélo, dar Basilìsko, ’z Tüsele Marüsele un vil åndre soin bidar gekheart zo leba vor an åndra manifestatzióng o: di veròin Eraquariodanza vo Parma - bodada arbatet a lusérnaren, di Lucia Nicolussi – hatt hergerichtet ploaz khlummane spetàkole in balt, nå ’z staigele von Tritt von Sambinélo. Di boch vorånahì in spetàkolo alle di atör håm gemacht di pròve atz Lusérn, lirnante o eppaz alln in khindar boden soin gånt nå. Haür anvétze atz Lusérn soinda zuargerift schiar sintzekh puam, nètt lai trianar ma vo auz o, boda vor viar tang – von 29 von sunjo atz 2 von ludjo – håm gelirnt zo faiva pittar kitàrr odar håm gepezzart baz sa soin sa gest guat zo tüana. Dar kurs iz khent hergerichtet vodar trianare schual vo musìk UpDoo un durchgevüart von gekhennate maistro Lorenzo Frizzera. Di puam håm genützt di lokél von Ponte Radio azpe schual un håm gemacht a par spetàkoli ummar pa lånt. Njånka zo tüanaz apòsta, dar kurs izzese gerift in lestéssege tage von J’azt Lusérn, di tappa von gekhennate Südtirol Jazz Festival boda sidar viar djar rift atz Lusérn o un boda, vor in earst sunta vo ludjo, hatt augehaltet ploaz laüt un turìstn in Platz. Nåmp allz ditza, azpe ’z iz traditzióng aromài, bartze haltn da Zimbar Kolònia von Kulturinstitut Lusérn o. Vo mearar baz zbuantzekh djar di djungen zimbarla mang lirnen zo reda azpe biar un zo nütza pezzar ünsarna zung spilante un stianate pitnåndar. ’Z iz hèrta asó schümma seng ke, alméno pan summar, Lusérn vülltze au pitt khindar un djunge puam boda rivan in lånt zo lirna boll eppaz naügez, ma zo khenna ünsarna zung un kultùr o. 

AvT