Aussant baz lai zo informàra di laüt vo bia ma kontrollàrt 's gevichra in da ünsar provìntz, bölltma süachan, asta di laüt gebinnen meara a kultùr, boda respettàrt di natur un basda drinn lebet. Nèt vo nicht di ausstellom is inténdart zo gedenkha in Mario Rigoni Stern o, gestorbet vor bintsche zait un a tschell vo dar zimbarn komunità vo Lusérn: Dar schraibar vo Slege, boda gearn is gònt a la katza un boda hatt gehaltet gearn di pèrng, hatt gelatt hintar soine tritt, boma diméar bart vorgèssan, in soin püacharn un poesìe, boda gem in laüt zo pensara, as be “Il bosco degli Urogalli”, “Storia di Tönle”, “Uomini, boschi e api”, “Il libro degli animali”, “Sentieri sotto la neve”.

Aussant baz zo presentàra vil fòte, boda zoang di vichar drinn in di natùr, bosa lem, in khòmmarn hergerichtet gerècht vor disan tèma, di ausstellom bart gem in laüt vil datn augemacht vo schentziètt zoa z'zoaganen baz vor a groasa bèlt vo gevichra da mang vennen seòndre in di ünsarn pèrng, haltante kunt von vicharn, boda soin sparìrt vo disan saitn, ma von sèllnen o, boda nò soin zo kheara bidar bodrùm est. Vor alln bölltma machan vorstìan di laüt, bele 's soinda di geschützatn vichar, boma mak vennen drinn in di ünsarn beldar, zoa asta disar tèma khemm bostérchart no meara in khöpf von laüt.

Zoa zo komplettàra di ausstellom bartnda khemmen ausgerichtet vil òndarne eventi, boda eppas hòm zo tüana pit disan tèma, durònte in summar: konferéntze un eskursióngen. Dar progròmma, bódase bart auroatan alle, bart khemmen ausgètt no in mònat von martzo 2009.

Di ausstellom bart offetüan in menta ats 13 von aprìle 2009, di viare dòpo mittartage un di bart offestian fin in menta von 2 von novémbre 2009. Denna bartse bidar offetüan von 26 von ditzémbre 2009 fin ats 6 von djennàro 2010.

Ma makse inschraim vor vüromen at di ausstellom odar durch pa lònt vor gruppn telefonàrante atn nùmero (0039) 0464-789638 odar schràibante atn indirìtzo email luserna@tin.it

  Bar gedenkhanas, ke durònte in summar (von 20 von sunjo fin ats 13 von settémbre) barta offe soin dar musèo Haus von Prükk o (a haus bidar hergerichtet asó as beda hòm ausgeschauget di lusérnar haüsar vor zaitn), sovl baz di pinakotèk “Rheo Martin Pedrazza”, a malar vo Lusérn emigràrt in Österraich, boda hatt gètt 's haus un 35 pildar soinar komunità.

An lestn gedenkhbaras, ke 's ista o no dar naüge bege “Sentiero cimbro dell’immaginario”, boda vüart durch pa natùr ummenùm in lònt, hergerichtet gerècht vor alle di laüt, djunge un alte, boda nèt lai zoaget da schümma lusérnar natùr, ma boda macht darvérn di laüt, boden nògian, vil von traditzióngen un von altn stördjela von zimbarn.

Pitte gètt vürsnen alls ditza un machts bissan vil òndarn laüt o.