Dar Centro Documentazione di Luserna - Dokumentationszentrum Lusern - ONLUS is au khennt gemacht bia geböllt von konsìljo von Kamòu vo Lusérn in luljo 1996 un dar is drinn khennt gelekk in di pjòne von svilùppo vor Lusérn, boda aus soin khennt gearbatet von Kamòu un vo dar Autonómegen Provìntz vo Tria.

     'S djar darnò in aprìle di Provìntz hatten òdarkhennt in Dokumentationszentrum - bias hoast in béleschan rècht - as be a "persona giuridica di diritto privato" ("Fondatzjóng") un denna issar in khennt getrakk ka dar pretùra vo Tria.

     Dar konsìljo vo dar amministratzjóng is augemacht pit qualifikàrate laüt, boda rapresentàrn in Kamòu vo Lusérn un méarane òndarne vìchtege istitutzjóngen: di Redjóng Trentino - Alto-Adige/Südtirol, di Università vo Tria, di Stat un di Università vo Innsbruck un in Kulturinstitut.

     Soi presidént is dar Luigi Nicolussi Castellan, boda bidar is dar pürgarmaistar vo Lusérn sidar in achte von madjo 2005.

     Dar Dokumentationszentrum is an organisatzjóng, boda nèt au is khennt gemacht zoa zo vorméara gèlt ma zoa zo hélva in lònt sòinante inténdart zo vorméara 's bissan, bódada is, zo macha au naüge sàchandar nützantes, zo lesa au testimonjòntze vo dar stòrdja von lònt un zo vorbértase dise.

Durònte in djardar passàrt sòinda khennt organitzàrt ploase konvéni zoa z'ziaga vürsnen in studjo un 's gebinna vo naüng bissan nützante, basda hòm gehatt vür zo traga studjàrate laüt un professördar o, un nèt lai bélesche; dar lest konvénjo “Archeologia ed eco-cultural resource management di montagna” ìssese gehaltet ats Lusérn von 2 fin ats 12 von novémbre 2004.

Di fondatzjóng lest au un haltet alla dar sort alte dokuméntn, boda eppas hòm zo tüana pittar stòrdja von lònt vo Lusérn, un di helft in laüt, bódase innvennen, zo gebìnnanen bissan un kultùr pittar hilf vo ausstellomen un vüaromen. Màchante alle dise viln arbatn, dar Dokumentationszentrum helft zo macha khemmen meara di laüt, bódase mang gebinnen soi proat ats Lusérn, un z'ziaga vürsnen in ekonòmegen svilùppo vo disarn germònofónegen zimbarn komunità.