Lusérn vinntse gòntz nidar züntrest in sud von Trentìno drau af nar sùnnegen hoachebene, a grümma tarràtz, boda schauget nidar in Vèneto, ausgepèrrtzt zbischnen in territòrio vo Lavrou un in baitn etzan von Vesan un vo Slege.
   Haüt Lusérn is das lest lònt, boda quase alle di laüt nützan a zimbar zung alle di tang, a prukh zbischnen dar zait gònt un in ta vo haüt, "a lònt aus vo dar zait", bódase hatt gehaltet gerècht soi atmosfèra vo patze durch alle di viln hundart djar vo soinar stòrdja, sèm boda steat vorpùntet kultùr un natùr pit traditzióngen un gebirta.
   Khenntma zo venna 's lònt, khenntma zo khenna an oàs vo patze, boda haltet boróatet vil naüges zo darvéra. Gìanante durch ka alln in vìchtegen saitn, bódase vennen ummenùm in lònt, saitma guat zo gòdranen da gesunta natùr un gìanante a spasso ummar pa beldar odar durch pa beng, boda traversàrn di baitn etzan, venntma bobràll vil interessòntege sàchandar gelatt hintar in dar lòngen stòrdja von hoachebenen. Fra alln disan sàchandarn stichta auvar gòntz starch dar Fòrte vo Lusérn.
   Ausanthi vo dar natùr un dar stòrdja vinnta platz vil kultùr o in hausmusèo "Haus von Prükk" un in khòmmarn genützt vor di ausstellomen von Dokumentationszentrum Lusérn.
    An lestn pàiteta alls das traditzionàlege zimbar geèssa zo khemma ausprovàrt un zo gevalla dar gorgl drinn in acht birthaüsarn vo Lusérn.

Klikht ò di guida gezoagat da atta rècht zoa zo macha a virtuàlage khear durch pa lònt!