Baz håmsa panåndar dar Papa Francesco un dar schraibar Antonie de Saint-Exupéry von Khlumma Printz? An uantzegez sachan: alle poade ren zuar inan khinn. Benda in lem di groazan laüt, machan hèrta di lestésegen sachandar, schaubolau zo giana in khèrn von sachandar, ziage abe di schintl, schauge azpe a khinn. Benda epparùmmaz khlopftar un rüafte halte au un lüsan. Lazz offe doin bege un lüsan hèrta. A khinn süacht zo pinta pitt alle un in alle süachtz libe un impaiteten daz lestésegez bodrùmm. Ditza iz allz daz sèll boda gevàllat in Zygmunt Bauman bodaz hatt gemacht pensàrn übar da lautrege società. Allz daz sèll boda mochat pintn; di arbat, di libe, a prodjèkt vor a komunità. Azto hast a hèrtz azpe a klummaz pisto guat eppaz zo impàitadar. In di khirch vo Papa Francesco, vorgèzz berda khütt “Ma hatt hèrta getånt asó”; da izta nètt platz vor ditza bort ma vor daz sèll vonan khinn. Benn ’z vorstar eppaz machez nètt stian letz; vorprennz nètt pittn börtar, darkhluppz nètt. Lazzen soi zait zo intrùama, zo prodjektàra ’z lem, di guatn sachandar dekhansase abe sedeguàl. Giben nètt allz inaran bòtta, ombrómm, untar in huat von burm mochsto schaung durch dèllant, pittn oang vo Gottarhear. Dar gröazarste intrùam von Gott iz koltevàrn soi rebe, seånka azta in Vangelo schaugetz nètt auz asó, benda di ruamar pintnse alùmma atz soine interessi. A trüpfle bazzar alùmma macht renvenìrn anìaglaz lem in desèrt o. Ma baz tüasto inan desèrt? Odar afnan planét? Eppaz naüge tüatze offe sèmm boda inngeat di sunn. Lazzte gian pittn hirn, lazz di vort, doin kontròllo, ’z iz a naügar libar, gloamar dar Gott trakte untar soine vèttrech. Papa Francesco lirnt a bòtta soin bischöf, soin pfaffan zo haba adosso ’z gestånkh vo dar obe, sait nåmp in laüt, alóra bartnzaz lüsnen. In disan lång viazo azpe dar månn von fligar höartze zovorlùr, vånk koràdjo, a khlümmaz töale vodar bèlt khennt alùmma di groazan sachandar von universo, vo bobar khemmen un bobar bartn gian. ’Z khüttarz alle di tage bendo lebest, bendode mövarst: bendo bokénnst doi Kreatór. Gedenkhte ke haüt zo tage di laüt soin nètt alùmma genützt, ma eppaz naügez izta vür khennt sa saung auz azpe a kultùra boda allz vantzàrt. Vor se Gottarhear azpe dar Khlumma Printz lazzte abe von hümbl zo laüchtega. Ditza khintaz gètt allz åna zo zala, genùmma haltnsa khunt. Benda dar tinntz iz gåntz khlumma un dòpo kresartar zo vånga platz in gåntz hèrtz, dizta beratz di arbat von taüvl; pait di libe boda kinnt vo Gottarhear alùmma. Hüatar un nètt padrù vodar sbestar earde, du mast nètt auzhakhan allz daz grümma, distrüdjarn di earde, ’z mer ’z valta allz, allz bart auzstèrm. Bar soin khennt gerüaft zo leba inan gart voll pitt roasan, zo haltada khunt. Konsolàr ber ’z gaülta, lach pitt benn ’z lachta, korédjar berda velt, haltzanzuar vor bem ’z hattzan mengl. Allz ditza iz “håm ånt”.
 
A.G. 
(prosegue su DSVL 18/08/17)